БИШКЕК, 25-янв. — Sputnik. Ден соолугу жактан мүмкүнчүлүгү чектелген жигиттер менен бир кыздан турган "Тумар" бий тобу America's Got Talent деп аталган сынакка катышуу үчүн Нью-Йоркто жүрүшөт. Бул туурасында коомдук ишмер Sputnik Кыргызстан агенттигине Ассоль Молдокматова кабарлады.
"Алар аман-эсен Нью-Йорк шаарына жетти. Балдарды ошол жерде жашаган мекендешибиз Максат тосуп алды. Бийчилер Эстегүл аттуу кыргызстандык жарандын үйүнө токтошот", — деди ал.
Майыптар арабасында отурган кыргызстандык "Тумарчыларды" америкалыктар аталган сынакка бир нече ирет чакырып, бирок, жолго каражат жоктугунан барбай калышкан. Молдокматова алардын океан ары жагына баргандардын ичинен үч кишинин жол киресин Бизнес жана илим университетинин камкорчулар кеңешинин төрагасы Нургалы Асаналиев көтөргөндүгүн айтты.
"Эми алардын татыктуу бий көрсөтүп, кастингден өтүп кетиши гана калды", — деп айтты Молдокматова.
Бул бийчилердин сыртка чыккан биринчи сапары эмес. Буга чейин Česko Slovensko má talent ("Чехия жана Словакияда таланттар бар") сынагында үчүнчү орунду багындырышкан. Ага чейин "Силер Түркиянын таланттууларысыңар" таймашына катышып, жарым финалга чейин жеткен.
