БИШКЕК, 25-янв. — Sputnik. Өспүрүмдөрдүн ортосунда болгон мушташтын негизинде түрдүү жаракат менен ооруканага түшкөн окуучулардын абалы жакшырып калды. Бул тууралуу эки райондун аймактык оорукана директорлору Sputnik Кыргызстан агенттигине билдирди.
Ал эми 21-январь күнү Ош облусунун Араван районунда 11-класстын балдары мушташып, төрт окуучу ооруканага түшкөн.
Араван райондук оорукананын директору Усманжан Мамажановдун айтымында, бейтаптардын үчөө травматология, дагы бири нейрогирургия бөлүмүндө дарыланууда.
"Балдардын биринин мойну катуу жаракат алган, экинчисинин ийнине бычак сайылган. Эки баланын баш мээси катуу чайкалган. Азыр баарынын тең абалы жакшырып калды. Бирок дагы бир жумадай дарыланышы керек", — деди Мамажанов.
Ал эми Кочкор аймактык ооруканасында дагы бир мектеп окуучусу курсагына бычак жеп дарыланууда. Оорукананын директору Туратбек Жумабеков мурдагыга салыштырмалуу окуучунун абалы бир топ жакшы экенин айтты.
"Жандандыруу бөлүмүнөн чыгырдык, абалы канааттандырарлык болуп калды. Бардык дары-дармекти алууда. Бычак ашказанына тийген, ич майы дагы жабыркап курсагына кан толуп калган. Азыр мурдагыга салыштырмалуу жакшы.", — деди Жумабеков.
Эки окуя боюнча тең кылмыш иши козголуп, учурда тергөө жүрүп жатат.
