Уильям Шекспирдин Англиядагы "Глобус" театрынын режиссеру жана актрисасы Сара Жейн Бергер марттын соңунда Кыргызстанга келип, "Макбет" спектаклин коюу боюнча даярдыкты баштайт. Бул туурасында Токтоболот Абдымомунов атындагы Кыргыз улуттук академиялык драма театрынын адабий бөлүмүнүн жетекчиси Алтынай Темирова Sputnik Кыргызстан агенттигине айтып берди.
"Сара Жейн Бергер бир жагынан 21-мартта бизде өткөн Ноорузду көрүп, театрыбыздын 90 жылдык юбилейине катышып, Кыргызстан менен таанышайын деген окшойт. Ал эми негизги максат — артисттер менен таанышып, "Макбеттеги" кайсы ролду кайсы актер ойнорун пландап, аныктоо. Ал эми күзүндө, буюрса репетиция башталат", — деди Темирова.
Темирова "Макбетти" Кыргызстандын театр сахнасына алып чыгууда кеткен каражатты демилге көтөргөн тарап көтөрө турганын кошумчалады.
"Макбет" — Уильям Шекспирдин белгилүү трагедияларынын бири. Чыгарма Шотландия падышасы Макбеттин жашоосунан алып жазылган. Анда Шекспир бийликке жетүү үчүн адамдардын жан талашуусу, достордун сатып кетүүсү, адамзаттын утурумдук кызыкчылык үчүн пендечилиги чагылдырылган.
