БИШКЕК, 24-янв. — Sputnik. Кыргызстандык саякатчы Азамат Жаналиев өзүнүн тарткан сүрөттөрүн Дубайда көргөзгөн соң, шейхтин сүрөтүн алтын мык, жип колдонуп тартышы мүмкүн. Бул тууралуу Sputnik Кыргызстан агенттигине өнөрпоз өзү билдирди.
Көргөзмөнү Дубайда уюштуруу февраль айынын ортосуна пландалууда. Жаналиев үч айда 14 сүрөт тартат. Эмгектеринин жетөө дүйнө жүзүнө таанымал инсандарга арналса, калган жети сүрөткө араб шейхтери түшүрүлөт.
"Учурда тарткан сүрөттөрүмдүн саны 7-8ге жетти. Мындан улам көргөзмө уюштуруу зарылчылыгы дагы пайда болду. Анткени чет өлкөлөрдө String Art стили менен тартылган эмгектер аз. Көргөзмөдөн соң Дубайдын шейхинин сүрөтүн алтын мык, жип менен тартуу демилгеси дагы айтылган. Учурда бул боюнча сүйлөшүүлөр жүрүүдө", — деди Жаналиев.
Кошумчалай кетсек, "Улуу Кыргыз изи" долбоорунун негиздөөчүсү Азамат Жаналиев буга чейин Саякбай Каралаев, Ахмад Кадыров, Владимир Путин, Пётр I жана Чыңгыз Айтматовдун сүрөттөрүн стринг-арт ыкмасы менен тарткан.
