БИШКЕК, 24-янв. — Sputnik. Тажикстандын милиция кызматкерлери ашыкча салмактан арылуусу керектигин РИА Новости өлкөнүн ички иштер министри Рамазан Рахимовго таянуу менен билдирди.
"Семирген милиция кызматкерлеринин иштөө жөндөмү төмөндөйт. Биздин кызматкерлер салмак, жаш, бой боюнча эл аралык нормаларга туура келиши керек", — деди ал.
Рахимов буйруктун аткарылышын ИИМдин алдындагы атайын комиссия тескей турганын кошумчалаган.
Министр өзү спорт менен активдүү машыгып жатат. Атын атагысы келбеген ИИМдеги булактын айтымында, министрликте иштегендер эки айдан бери жумасына бир жолу үч чакырым аралыкка чуркап, мекеменин бассейнинде сүзүүдө.
"Азырынча бизге кандай параметрди сактоо керектиги айтыла элек. Ошентсе да кызматкерлердин 50 пайызынан ашыгы 5-10 килограммга арыкташты", — деди ал.
Буйрукка ылайык, ашыкча салмак алган кызматкерлер кызматтан кетирилет.
