БИШКЕК, 24-янв. — Sputnik. Бүгүн тоолуу аймактардагы автоунаа жолдорунда кар көчкүнү атайылап түшүрүү иш-чаралары жүргүзүлөрүн ӨКМден кабарлашты.
Билдирмеге караганда, жолдорго кар көчкү түшүү коркунучу жаралгандыктан көчкүнү атайылап түшүрүү тапшырмасы берилген.
"24-январдан 30-январга чейин Бишкек — Ош унаа жолунун 132-137, 198-265-чакырымдарында жана Ала-Бука — Каныш-Кыя жолунун 65-100 чакырымдарында кар көчкүсүн атайылап түшүрүү иштери жүргүзүлөт", — деп айтылат маалыматта.
Иш-чараны ӨКМдин ыкчам тобу жетектейт. Артиллериялык иш-чаранын аякташына чейин Саламаттык сактоо министрлигинин тиешелүү медицина кызматкерлери коштоп жүрөт.
ӨКМ аталган тоолуу участкалар менен жол жүрүүдөн баш тартууну сунуштайт.
