БИШКЕК, 21-янв. — Sputnik. Бишкектин чок ортосунда жолдун кесилишине туруп калган унаа айдоочусу инспекторлор менен милиция бөлүмүнө баруудан баш тарткан. Бул тууралуу Sputnik Кыргызстан агенттигинин кабарчысы жеринен билдирүүдө.
Буга чейин Кайгуул милициясы түзүлгөн протокол менен макул болбогон айдоочу Бөкөнбаев менен Абдрахманов көчөлөрүнүн кесилишине туруп калганын билдирген.
Айдоочу окуя тууралуу өзүнүн оюн билдирди. Анын айтымында, унаанын жол ортосуна токтоп калышына бузулуп калышы себеп болгон.
"Элди башка микроавтобуска түшүргүчөктү милиция кызматкерлери келип, унааны алуу талабын коюшту. Авариялык кырдаал жаралгандыктан, мен болбой койдум", — деди айдоочу.
Ал милиция бөлүмүнө тартуудан баш тартканын белгиледи. Күбөнүн айтымында, милиция күч менен алып кетүүгө аракет кылганда, айдоочу тротуардын жанындагы темир тосмону бекем кармап кое бербей, ЖМК өкүлдөрү келмейинче жылбай койгон.
Учурда окуя болгон жерде автотыгындын жаралганы байкалууда.
