Аңчылыкты көзөмөлдөө жана аңчылык ресурстарын санын жөнгө салуу департаментин (Аңчылык департаментин) жоюу керек. Бул тууралуу Sputnik Кыргызстан агентигине "Республика — Ата-Журт" фракциясынын депутаты Максат Сабиров билдирди.
Белгилей кетсек, аталган маселе бүгүн Жогорку Кеңеште каралып, айрым депутаттар демилгени колдоого алган.
"Бүгүнкү күндө 20 миңге жакын мергенчи болсо, болгону 100 мамлекеттик, 150 жеке егерлерибиз иштейт. Анан жаныбарларыбызды ким коргойт? Учурда жаныбарлар атылып, карагайларыбыз кыйылып жатат. Карап көрсөк, жапайы жаныбарларды кырып жиберчүдөйбүз. Ала-Арчада элик, бугу жайнап жүрчү, азыр ал жактан өрдөк көрбөйсүң. Ошондуктан Аңчылык департаментин жаап туруп, Жаныбарларды коргоо департаментин ачууну сунуш кылдым", — деди Сабиров.
Эл өкүлү департаменттин атын өзгөртүү менен кошо жаңы сунуштарды киргизүү керектигин кошумчалады.
"Учурда 2030-жылга чейин аңчылыкка мараторий киргизүү боюнча мыйзамды даярдап жатабыз. Болбосо миллиондогон долларларды коротуп жаныбарларды дарылаганыбыз эмне? Атып жаткандар менен күрөшпөгөндөн кийин дарылоонун эмне зарылчыгы бар?" — деди депутат.
Сабиров азырынча бул жөн гана сунуш экенин айтып, маселе тереңирээк караларын кошумчалады.
