БИШКЕК, 8-янв. — Sputnik. "Кыргызстан чүрөгү — 2013" наамынын ээси Жибек Нукееванын өмүрүн сактап калчу операцияга 15 миң доллар жетпей жатканын анын эжеси Медина Нукеева Sputnik Кыргызстан агенттигине билдирди.
"Ушул убакка чейин банктык эсепке түшкөн акчаларды эсептеп көрдүк. Азыр операцияга дагы 15 миң доллар жетпей жатат. Болгон үмүтүбүз 21-январда боло турган концертте болуп турат. Ал күнү ырчылар менен моделдер "Сейтек" борборунда "Жибек, сен жашашың керек!" аттуу кайрымдуулук концертин өткөрүшөт", — деди Нукеева.
Бир нече күн мурда Жибектин операциясына белгилүү банктардын бири 5 миллион сом каражат бөлгөнү жарыяланган.
Эске сала кетсек, рак илдетине кабылган Жибек Нукеевага зарыл операция Чехиянын Прага шаарындагы Протондук терапия борборунда жасалып, анын баасы 80 миң евро турарын эжеси Медина билдирген.
