БИШКЕК, 7-янв. — Sputnik. Стамбулдагы аба ырайынын катаалдыгына байланыштуу Бишкекке келе турган учактар кармалып турат. Бул туурасында Sputnik Кыргызстан агенттигине "Манас" аэропортунан билдиришти.
Маалыматта Стамбул шаарында катуу кар жаап жаткандыктан, учактардын учуп-конуусуна тоскоолдук жаралганы айтылат. Мындан улам Бишкекке уча турган ТК348 рейсинин каттамы токтотулган.
Ошондой эле Стамбулдан дагы бир рейс кармалган. Самолет Бишкекти көздөй түнкү саат 3.00дө учушу керек эле. Эми жаңы түзүлгөн расписание боюнча учак Бишкекке 16.00дө конушу ыктымал.
Мындан тышкары таңкы саат 7:55те Бишкектен Стамбулга уча турган рейс дагы токтотулган.
Ал эми эртеңки каттамдар кадимки режим менен иштей турганын "Манас" аэропортунан билдиришти.
