"Ала-Тоо" аянтындагы жаңы жылдык жасалга январдын аягына чейин турат

© Sputnik / Табылды КадырбековЦеремония зажжения главной новогодней елки на площади Ала-Тоо
Церемония зажжения главной новогодней елки на площади Ала-Тоо - Sputnik Кыргызстан
Жазылуу
Быйыл аянтка орнотулган башкы балатынын бийиктиги 25 метрге жетти.

БИШКЕК, 6-янв. — Sputnik. Бишкектеги борбордук "Ала-Тоо" аянтындагы балаты 15-январда алынып, ал эми калган жаңы жылдык жасалга айдын аягына чейин турарын мэриянын маалымат кызматынын жетекчиси Гуля Алмамбетова Sputnik Кыргызстан агенттигине билдирди.

Анын айтымында, башкы балаты былтыр да эски жаңы жыл майрамдалгандан кийин алынган.

"Быйыл аянтка күнүгө келген элдин көптүгү кубандырат. Адамдардын жаңы жылдык маанайын узакка сактоо үчүн мэрдин тапшырмасы менен жасалгаларды айдын аягына чейин калтыруу чечими кабыл алынды", — деди Алмамбетова.

Борбор калаанын Ала-Тоо аянтында атылган майрамдык салюттун асмандан көрүнүшү - Sputnik Кыргызстан
Борбор калаанын "Ала-Тоо" аянтында атылган майрамдык салюттун асмандан көрүнүшү
Эскерте кетсек, "Ала-Тоо" аянтын жаңы жылдык мааракеге карата кооздоо иштери 4-декабрда башталып, аны аткарууга "Тазалык" менен "Бишкекжарык" ишканаларынын 40 кызматкери тартылган. 

Кыргызстандын 25 метрлик башкы балатысына улуттук стилдеги 77 жасалга илинген. Мындан тышкары, 60 жылдызча жана 50 кар бүртүкчөлөрү менен кооздолгон. Балатыдагы оюнчуктардын жалпы саны 1200дү түзүп, мындан тышкары 260 гирлянда илинди. Анын узундугу 2,5 чакырымга жетет. "Ала-Тоо" аянтынын бет маңдайында диаметри эки метрлик 12 шар, алты бугу, Аяз ата жана Кар киши коюлган. Жаңы жылдык маанайды жаратуу үчүн мэрия 13 миллион сом сарптаган.

Жаңылыктар түрмөгү
0