БИШКЕК, 6-янв. — Sputnik. Ош облусуна караштуу Кара-Суу районундагы Мады айылынын тургуну Акжол Калбаев тажик жараны тарабынан барымтага алынып, 10 күн бою кыйноого алынганын Sputnik Кыргызстан агенттигинин аймактык кабарчысына билдирди.
Маалыматка караганда, Тажикстандын Н.Н. аттуу жараны Калбаевдин үй-бүлөсүнөн 23 миң доллар талап кылган.
“Н.Н. менен 2011-жылдан бери таанышмын. Аны менен үй-бүлөлүк катышыбыз дагы бар болчу. Узаган жылдын 14-декабрында Хожентке конокко чакырган. Баргандан кийин баласы экөө мени ур-токмокко алып, колу-бутумду кескилешти. Үй-бүлөмдөн 23 миң доллар талап кылышты”, — деп билдирди Калбаев.
Жабыркоочу учурда Ош шаарындагы жеке менчик ооруканада дарыланып жатат.
Ал эми Ош облустук ИИБдин маалымат кызматынын өкүлү Жеңиш Ашырбаев тажик жаранына кылмыш иши козголгонун билдирди.
“Кыргыз жаранын Тажикстандын укук коргоо органдары 29-декабрда барымтадан куткарышкан. Учурда биздин жаран ооруканада. Абалы туруктуу. Ал эми тажик жаранына Тажикстандын Кылмыш жаза кодексинин бир нече беренелери боюнча кылмыш иши козголду”, — деди Ашырбаев.
Анын айтымында, жабыркоочунун адвокаты учурда тиешелүү документтерди топтоп жатат.
