Президент 2017-жылды Ыйман, адеп жана маданият жылы деп жарыялады

БИШКЕК, 5-янв. — Sputnik. Президент Алмазбек Атамбаев 2017-жылды Ыйман, адеп жана маданият жылы деп жарыялоо жөнүндө Жарлыкка кол койгонун өлкө башчынын маалымат кызматы билдирди.

Жарлыкта 2016-жылы өткөрүлгөн Тарых жана маданият жылы жалпы колдоого ээ болуп, элибиздин тарыхый жана маданий мурасынын түгөнгүс кудурет-күчүн ачып көрсөттү жана жаңы кыргыз коомун түзүүгө негиз болгудай пайдубал бар экенин ырастаганы белгиленет.

"Учурда кыргыз элинин мезгил сыноосунан өткөн руханий жана адеп-ыймандык асыл-нарктары менен алдыңкы дүйнө таанымды айкалыштырган ар тараптан жетик инсанды калыптандыруунун мааниси өстү. Кыргызстан ийгиликтүү өнүгүшү үчүн жарандарыбыз, жаштарыбыз адептүү жана ыймандуу, терең билимдүү, башка ой-пикирлер менен көз караштарга сабырдуу болуп тарбияланууга жана, албетте, өз элинин тарыхы менен маданиятын билүүгө тийиш. Ошондуктан, азыркы шартта заманбап билим берүү, маданият жана маалымат саясатын калыптандыруу, өз тарыхыбыз менен маданиятыбызга таянуу аркылуу таалим-тарбия системасын түзүү мамлекеттин маанилүү милдети болуп саналат", — деп айтылат Жарлыкта.

Президент өкмөткө Ыйман, адеп жана маданият жылын өткөрүү боюнча уюштуруу комитетин жарандык коомдун өкүлдөрүнүн катышуусу менен түзүүнү, аталган жылды өткөрүү боюнча иш-чаралардын планын иштеп чыгууну тапшырды.

Ал эми Жарлыктын аткарылышын көзөмөлдөө президент аппаратынын жетекчисине жүктөлдү.

Жарлык расмий жарыяланган күндөн тартып күчүнө кирет.