БИШКЕК, 2-янв. — Sputnik. Бишкек шаарынын мэрлигине Албек Ибраимовдун талапкерлиги көрсөтүлүп жатканын Бишкек шаардык кеңештин маалымат кызматы билдирди.
Ага ылайык, мындай чечим 31-декабрда көпчүлүк коалиция тарабынан кабыл алынган. Аталган коалициянын лидери Алмаз Кененбаевдин айтымында, депутаттар бир добуштан Ибраимовдун талапкерлигин көрсөтүүгө макул болушкан.
“Албек Ибраимов өзүн мыкты менеджер жана чарбачыл адам катары көрсөтө алды”, — деди лидер.
Эскерте кетсек, 30-декабрь күнү 27-чакырылыштагы шаардык кеңештин депутаттары алгачкы жыйынын өткөрүштү. Ага чейин КСДП, "Республика — Ата-Журт" жана "Кыргызстан" фракциялары 30 депутаттан турган коалиция түзүшкөн. Ал эми "Өнүгүү — Прогресс" менен "Мекеним Кыргызстан" оппозицияда калышты. Алар 15 депутаттан турат. Ошол эле жыйында Канатбек Музуралиев шаардык кеңештин төрагалыгына шайланды.
