БИШКЕК, 30-дек. — Sputnik. Бишкек шаардык кеңештин төрагасы болуп "Республика — Ата-Журт" фракциясынан депутат Канатбек Музуралиев шайланды.
Бүгүн, жума күнү 27-чакырылыштагы шаардык кеңештин депутаттары алгачкы жыйынын өткөрүштү. Анда төраганы шайлоо негизги маселелердин бири болду. Ага чейин КСДП, "Республика — Ата-Журт" жана "Кыргызстан" фракциялары 30 депутаттан турган коалицияны түзүшкөн. Ал эми "Өнүгүү — Прогресс" менен "Мекеним Кыргызстан" оппозицияда калышты. Алар 15 депутаттан турат.
Канатбек Музуралиев коалиция тарабынан сунушталган. Анын талапкерлигине "макул" деп 34 депутат добуш берсе, сегизи каршы чыккан. Жалпы 43 депутат добуш берсе, бир бюллетень жараксыз деп табылган.
Эскерте кетсек, 11-декабрда борбордук парламентке депутаттардын тандоо боюнча шайлоо өткөн. 45 мандат үчүн 14 партия ат салышып, жети пайыздык чектен ашкан беш партия шаардык кеңешке өткөн.
