БИШКЕК, 28-дек. — Sputnik. Ош шаарынын мэри Айтмамат Кадырбаев "Келечек" чыгармачыл балдар борборунда балдар үчүн уюштурулган "Алтын балаты" аттуу жаңы жылдык майрамга катышты. Бул тууралуу Ош шаардык мэриясынын маалымат кызматы кабарлады.
Жаңы жылдык балатыга аз камсыз болгон үй-бүлөлөрдүн балдары, мүмкүнчүлүгү чектелген, балдар үйүндө тарбияланып жаткан наристелер, көзү азиздер үчүн адистештирилген мектептин балдары жана шаардагы алдыңкы окуучулар чакырылган.
Ош шаарынын башчысы келечек муундун өкүлдөрүн билимдүү болууга үндөп, Жаңы жылы менен куттуктады.
"Силер бүгүн балалык кыялыңар менен мугалим, дарыгер, актер, космонавт, инженер болгуңар келет. Мен тилегиңердин ишке ашышына тилектешмин. Көп окуп, билимиңерди жогорулатып, жүрүм-турумуңар менен башкаларга үлгү болгула. Жаңы жыл силерге жаңы ийгиликтерди, жакшылыктарды алып келсин," — деди Кадырбаев.
Майрамдык иш-чарада наристелерге майрамдык маанай тартууланып, 160дан ашуун балага мэр Кадырбаевдин атынан белектер тапшырылды.
