БИШКЕК, 28-дек. — Sputnik. Бүгүнкү эл аралык кино күнүнө карата Sputnik Кыргызстан агенттигинин мультимедиалык борборунда Астана — Бишкек — Кишинев — Минск видеокөпүрөсү болуп өттү. Ага Кыргызстан тараптан белгилүү режиссер, Кыргыз Эл артисти Болот Шамшиев менен Геннадий Базаров катышып, киноматографтар 2016-жылдагы кино жаатындагы жетишкендиктерди жана кемчиликтерди талкуулашты.
"Кыргызстанда жаш режиссерлор көп, жылына 100 тасмага чейин тартышат. Бирок көпчүлүгү каражатты өз чөнтөгүнөн чыгарып, аракет кылып жаткандар. Мамлекет тарабынын 25 жылдан бери эки гана тасма каржыланды десем болот", — деди Шамшиев.
Видеокөпүрөгө катышкандарды Молдованын кино тармагындагы абал тынчсыздандырды. Молдовалык режиссер жана сценарист Николай Гибунун айтымында, өлкө жетекчилиги кино тармагынын өнүгүүсү түгүл, СССР убагындагы тасмаларды элге көрсөтүп, сактап калууга аракет кылган жок.
"Молдовада совет доорунда тартылган тасмалар 25 жылдан бери көрсөтүлбөйт. Ал эми жаш режиссерлордун тасмалары биринчи жолу көрсөтүлгөн залда эле "өлүмгө" дуушар болот. Биз мына ушундай көйгөй менен жашап келе жатабыз", — деди Гибу.
Видеокөпүрөнүн аягында Кыргызстан, Белоруссия, Молдова, Казакстан жана Россиянын киноиндустрия тармактарын өнүктүрүү, колдоо максатында биргелешкен фонд түзүү сунушу айтылды. Молдовалык режиссер ага жетекчи катары Болот Шамшиевдин талапкерлигин сунуштады.
