Бишкек — Ош унаа жолундагы сатылып жаткан мыйзамсыз тамак-аш, мөмө-жемиштер талапка жооп бербейт. Бул тууралуу Чүй облустук мамлекеттик монополияга каршы жөнгө салуу бөлүмүнүн башчысы Азамат Жакыпов билдирди.
Анын айтымында, унаанын газына ууланган азыктарды кардарлар албай эле койгон туура.
"Бишкек — Ош жолунун бою өзүнчө базарга айланып кетиптир. Тамак-аш, мөмө-жемиштер сатылып турат. Эки жакка өткөн унаалардын уулуу заттары келип эле ошолорго тиет. Аны жеп жаткан адамдын ден-соолугу эмне болот, сатуучулар ойлонбойт. Базардын ичинде бош орундар көп эле экен, ошол жакка баарын жайгаштыруу керектигин жергиликтүү бийликке эскерттик. Бул сатуучулардын атайын мыйзамдуу документтери жок болгондуктан жергиликтүү көзөмөлдөө органдары соодагерлерге чара көрүү иштери бир топ оор болуп жатканын айтышты", — деди Жакыпов.
Мындан сырткары, мониторинг учурунда базардын ичиндеги бир катар азыктар жана базардын абалы текшерилген.
