Жубайым болгон латыш кызы Анастасияны көрүүгө айылдын теңи келди. Бул тууралуу Sputnik Кыргызстан маалымат агенттигине келиндин жолдошу Уларбек Бакырдинов билдирди.
Анын айтымында, алар декабрь айынын башында Ат-Башы районунун Кара-Булуң айылына байкесиникине барышкан.
"Нарынга жакшы барып келдик. Атайын агабыздын үйүнө конок тосуп кызмат кылганды үйрөнсүн деп алып барганбыз. Айылда келин көрөбүз деп кошуналар, туугандар, жеңемдин абысындары, айтор, айылдын теңи келди окшойт. Настяга да айылдын эли абдан жакты", — деди Уларбек.
Уларбек Настя жеңесинен үйрөнгөндөрүн акырындык менен үйдөн жасай баштаганын кошумчалады.
"Жарма жасаганды үйрөндүм, талкан алып келип берчи" деп менден суранып жатат. Нан жасаганды да үйрөнүп, үйдөн жасай баштады. Албетте, апамдын нанына окшошпойт, бирок үйрөнчүктүкү катары жакшы эле", — деп кошумчалады Анастасиянын жолдошу.
Жигит Анастасиянын кесиби маданият таануучу болгондуктан ал үчүн башка улуттун маданият, салт-санаасын өздөштүрүү кызык болуп жатканын баса белгиледи.
