БИШКЕК, 27-дек. — Sputnik. WhatsApp тиркемесинде белгисиз адамдар мандарин жегенден кийин сасык тумоого же тамак оорусуна чалдыгып, инфекциялык ооруканага жатып калгандары тууралуу билдирүүнү таркатып жатышат. Үн менен жазылган билдирүүдө Кыргызстан тууралуу кеп болуп жаткандыгы айтылбайт, бирок КРдин колдонуучуларынын чат-топторуна келип түшүүдө.
"Саламатсыздарбы, бизди кечээ эле инфекциялык ооруканадан чыгарышты. Ишенбейсиңерби, ангина менен жатып чыктык. Азыр ротавирус жүрүп жатат. Ишембиге караган түнү 53 адам, жекшембиге караган түнү 31 адам ооруканага жаткырылды. Дарыгер мандарин жегенге катуу тыюу салды", — деп аялдын үнү менен айтылат.
Республикалык клиникалык инфекциялык оорукананын башчысы Гүлжигит Аалиевдин айтымында, мандариндин айынан сасык тумоого же ангинага чалдыгып ооруканага жаткырылган окуя болгон эмес.
"Мындай окуялар медициналык адабиятта жок", — деди Аалиев.
Дарыгер жарым жыл мурун WhatsApp тиркемесинде адамдар сибирь жарасына чалдыгып, инфекциялык ооруканага жаткырылууда деген имиш сөздөр чыкканын белгилеп, бул болуп жаткандарды "жалган" билдирүү деп атады.
