БИШКЕК, 16-дек. — Sputnik. Түштүк Казакстан облусунун Аккум айылынын тургундары лейшманиоз оорусуна массалык түрдө чалдыккандарын айтууда. Бул тууралуу КТК телеканалдын шилтемеси менен Sputnik Казакстан билдирди.
Айылда 300дөй түтүн бар, анын дээрлик бардыгы илдетке туш болгон.
"Бул оору майда чиркейдин чакканынан башталат. Андан кийин кызыл так тез эле жарага айланат. Бул жарадан төрт айдан кийин гана арылууга болот. Лейшманиоз бул аймактарда 80-жылдары байкалган. Ошондуктан бул жерде адис эместер деле дартты аныктай алат. Көп жылдан бери оору унутулуп калган", — деп айтылат телесюжетте.
Айыл тургундарынын айтымында, аталган оору жай мезгилинде чиркейлерден улам пайда болду. Бүткүл дүйнөлүк саламаттык сактоо уюмунун маалыматына ылайык, оору өнүгүп бара жаткан жана кедей өлкөлөрдө кездешет. Жара оорубаганы менен катуу кычыштырат.
