БИШКЕК, 21-дек. — Sputnik. Sputnik Кыргызстан маалымат агенттиги жана радиосу МАРАЛ FM радиостанциясынын угармандары арасында жүргүзгөн сурамжылоосунун натыйжасында 2016-жылдын мыкты маалымат каражаты деп табылды.
Сурамжылоо биринчи ирет өтүп, коомдук-саясий, маданий, ишкердүүлүк жана спорт тармагында 20 номинация боюнча жүргүзүлгөн. "Жылдын мыкты ЖМКсы" номинациясында КТРКнын "Кыргыз радиосу", akipress.org, 24.kg сыяктуу өлкөнүн медиа мейкиндигиндеги лидер маалымат порталдар ат салышкан.
Sputnik Кыргызстан агенттигинин жетекчиси Елена Череменина Кыргызстандын медиарыногу күчтүү оюнчулардан турган олуттуу аянтча экенин белгилеп, кесиптештерге мыкты сурамжылоо уюштурганы, ал эми окурмандарга колдоосу үчүн ыраазычылык билдирди.
Sputnik Кыргызстан өз ишин 2014-жылдын декабрь айында баштаган. Агенттиктин активинде кыргыз жана орус тилдериндеги маалымат порталы, радиоресурс жана жогорку технологиялык мультимедиалык маалымат борбору бар. Sputnik Кыргызстан өлкөдөгү интернет ЖМКлардын ичинен алдыңкы катарды ээлейт.
Sputnik Кыргызстан ондогон өлкөлөрдө мультимедиалык хабдары бар эл аралык маалымат агенттиги жана радиосунун бир бөлүгү болуп саналат. Sputnik өз карамагына 30дан ашуун тилде жарык көргөн сайттарды, аналогдук жана санарип радиоберүү, мобилдик тиркемелерди, жана социалдык тармактагы баракчаларды камтыйт. Катталуучулар үчүн жаңылыктар англис, араб, испан жана кытай тилдеринде жарыяланат.
