БИШКЕК, 21-дек. — Sputnik. Россиянын Түркиядагы элчиси Андрей Карловдун өлүмүнүн жоопкерчилигин "Джейш аль-Фатх" деп аталган террордук уюм өз мойнуна алды. Бул тууралуу РИА Новости жазып чыкты.
Таратылган билдирмеге караганда, Карловду өлтүргөн полициянын мурдагы кызматкери Мевлют Мерт Алтынташ аталган уюмдун мүчөсү болгон.
Эске салсак, 19-декабрда Анкарада өтүп жаткан сүрөт көргөзмөсүнүн ачылыш аземинде россиялык элчи Андрей Карловго ок атылып, оор абалда ооруканага жеткирилген. Алган жараатынан улам дипломат көз жумган. Элчиден башка үч адам жабыркаган. Ок аткан кылмышкер жергиликтүү полиция тарабынан ошол жерде атып өлтүрүлгөн.
