БИШКЕК, 19-дек. — Sputnik. Өкмөттүн Ысык-Көл облусундагы ыйгарымдуу өкүлү Асхат Акибаев атайын кызматтарга облус аймагындагы жайкы туристтик объектилердин даярдыгын текшерүү боюнча тапшырма берди. Бул тууралуу өкүлчүлүктүн маалымат кызматы билдирди.
Ага ылайык, Акибаев облустун архитектору Мурат Токоевду, экотехникалык инспекциянын башчысы Талант Борочоровду, облустук капиталдык курулуш башкармалыгынын жана Ысык-Көл өнүктүрүү фондунун жетекчиси Таалай Мамбеткуловду кабыл алды.
"Биз маселени жайкы туристтик сезон башталганда эмес, алдын ала комплекстүү түрдө чечишибиз керек. Санаторий менен пансионаттар 2017-жылдын майына чейин экологиялык жана техникалык экспертизадан өтүшү керек. Экспертизадан өтүп тийиштүү документтерди албаган жайларга эс алуучулар киргизилбейт. Ошондой эле экотехинспекция көл жээгине мыйзамсыз курулган объектилерди алдыруу керек", — деди Акибаев.
Ал ошондой эле облустук архитектура жана капиталдык курулуш башкармалыгына экологиялык коопсуздук стандарттарына туура келген унаа токтотуучу жайларды куруу планын иштеп чыгуу тапшырылды.
