БИШКЕК, 19-дек. — Sputnik. Жекшемби күнү таң эрте болжол менен саат 10до 102 номерине билдирүү түшкөн. Анда күбөлөр жаңы төрөлгөн ымыркай көтөргөн мас аялдын жүргөнүн айтып, ал жерге Кайгуул милициясы барган. Бул тууралуу Бишкек ШИИБнин маалымат кызматы кабарлады.
"Кайгуул милициясынын кызматкерлери аталган аялды таап, милициянын №8 шаардык бөлүмүнө алып барышкан. Ал жерге Тез жардам кызматы чакырылган. Дарыгерлер ымыркайга болгону үч жума болгонун айтышкан. Баланын кароосу жакшы экени байкалган", — деп милициядан маалымдашты.
Белгилүү болгондой наристе Бишкек шаардык ички иштер башкармалыгынын жашы жете элек балдардын иши боюнча инспекциясына өткөрүп берилди. Андан ары дарыгерлердин коштоосунда ымыркай Бишкектеги балдар үйүнө жеткирилди.
Кармалган аялдын чоо-жайы тууралуу милиция кызматкерлери жооп берген жок.
