БИШКЕК, 19-дек. —Sputnik. Кыргызстандын "Азия MIX" командасы 23-декабрь күнү Россия КВНинин жогорку лигасынын финалында 2016-жылы эң мыкты делген төрт команда менен күч сынашат.
Биздин командага "Спарта" (Астана), "Радио Свобода" (Ярославль), Мурманск шаарынын жана Москва циркинин курама командалары атаандаш болот.
Учурда "Азия MIX" командасынын жигиттери Москва шаарында катуу даярдык көрүп жаткан кези.
"Учурда күндүр-түндүр даярдык көрүп жатабыз. Алдыдагы үч күн биз үчүн өтө маанилүү. Оюндун масштабын өзүңөр жакшы түшүнөсүңөр да. Жаңы каармандар, тамашалар көп болот. Бирок алар жөнүндө айтпай эле коеюн, кызыгы кетип калат. Көрүүчүлөр бардыгын эфирден көрүшсүн", — деди команданын мүчөсү Эрмек Кененсаров.
Жыйынтыгында "Азия MIX" — 15,7 упай, "Радио Свобода" — 15,4 упай жана калыстар тобунун тандоосу менен Москванын цирк өнөрпоздору финалга чыгышкан.
