БИШКЕК, 18-дек. — Sputnik. Борбор калаада жер титирегенин калаа тургундары сезгенин билдиришти. Силкинүү 11.54тө катталган.
Бишкекте силкинүү бир нече ирет болду. Алдын ала маалыматтар боюнча андан жабыр тарткандар жана кыйроолор катталган жок.
Бишкектин жашоочулары алгач, катуу үн коштоп, андан соң жер силкингенин социалдык тармактарга жазды.
"Мен эшикке качып чыктым, жан таттуу экен", — деп жазды Омор Кадырбеков аттуу интернет колдонуучу.
Акыркы айларда Кыргызстандын түштүк аймагында 3-4 баллдык жер титирөөлөр арбын кездешип келет. Ал эми кечээ Жалал-Абад облусунун аймагында күчү беш баллга жеткен жер титирөө катталган.
Бишкекте 2-3 баллга жетти
ӨКМ Бишкекте силкинүүнүн күчү 2-3 баллга жеткенин маалымдады.
Жер cилкинүүнүн очогу Кордайга кеткен аймакта, болжол менен Бишкек шаарынан 60 чакырым алыстыкта жайгашып, магнитудасы 5ке жетти. Бул туурасында маалыматты Европадагы жер ортолук сейсмологиялык борбор да өзүнүн сайтына жайгаштырган.
Ал эми Сейсмолог Абдрахматов келе жаткан 2017-2018-жылдары жердин силкинүүсү көбөйүп, 4-5 баллга жеткен учурлар катталышы мүмкүндүгүн айткан.
Эмне үчүн жер титирөөлөр болорун Sputnik Кыргызстан инфографикасынан көрүңүздөр>>
