БИШКЕК, 17-дек. — Sputnik. Түркиядагы жардыруудан улам Кыргызстандын Анкарадагы элчилиги Кайсеридеги студенттерге чалып ал-абалын билгенин элчиликтен Sputnik Кыргызстан агенттигине билдиришти.
Белгилей кетсек, Түркиянын Кайсери аймагында Эржейиз университетинин жанында аскерлерди ташып бараткан автобус жардырылып, 13 киши каза таап, 48 киши түрдүү жаракаттарды алган.
#BREAKING First video footage from the explosion scene in #Turkey's #Kayseri. Witnesses say it is a car bomb attack. pic.twitter.com/AqJKyvkXuL
— Mehmet Dikbayir (@dikbayir_en) December 17, 2016
"Акыркы маалыматтар боюнча жардыруудан, бактыга жараша, кыргызстандыктар жабыркаган жок. Аларга ар саат сайын чалып, маалымат алып жатабыз. Студенттер өздөрү да чалып жатышат. Абалга элчи өзү көзөмөл салууда", — деп элчиликтен маалымдашты.
Белгилей кетсек, мурдагы айыл-чарба министри Төрөгул Беков Россиядан биздин редакцияга чалып, жардыруу болгон жакын университетте анын баласы окуй турганын билдирди.
"Биз чалып кабарлаштык, баары жайында экен. Ал жактагы элчиликтен студенттерге чалып, маалымат алышыптыр. Элчиликке рахмат. Биз да көп кабатыр болбой калдык", — деди Беков.
Sputnik Түркия маалымат агенттигинин акыркы кабарына ылайык, өлкөнүн улуттук коргонуу министри Фикри Ышык, ички иштер министри Сүлейман Сойлу, саламаттык сактоо министри Режеп Акдаг жана айлана-чөйрө жана шаар министри Мехмет Өздхасеки жардыруу болгон Кайсери аймагына жөнөп кетти.
