БИШКЕК, 16-дек. — Sputnik. Кыргызстандык эмгек мигранттарынын Казакстанда кургак учук оорусуна кабылуу коркунучу күч. Бул тууралуу "Кыргызстан — Астана" кыргыз этномаданий бирикмесинин төрагасы Шавкат Исмаиловго шилтеме кылып "Замандаш" ассоциациясы билдирди.
Уюштуруучулар белгилегендей, акция "Казакстандагы эмгек мигранттардын арасында кургак учукту дарылоо жана чек аралык көзөмөлдөөгө багытталган иш-чаралар" аттуу долбоордун алкагында өтүп жатат. Аталган иш-чара Казакстандын 2014-2020-жылдарда кургак учукка каршы күрөшүү боюнча комплекстүү пландарынын негизинде ишке ашып жатат.
Базардагы мигранттар акысыз флюорографиядан өтүүгө жана фтизиатр-дарыгерлеринен кеп-кеңеш алуу мүмкүнчүлүгүнө ээ болушту.
"Дартты эрте аныктоо жана өз убагында дарылоо — кургак учукка каршы күрөшүүнүн негизги учуру. Эмгек мигранттары мекенинен алыс болгондуктан Казакстандын жарандары сыяктуу дарыгерлерге эркин бара алышпайт. Ошондуктан бул коркунучтуу ооруга чалдыгууга тобокели жогору болгон топко кирүүдө", — деди Исмаилов.
Мындан сырткары, кызматкерлер Казакстанда иштөө жана ал жакка баруунун эрежелери тууралуу маалымат беришти.
