БИШКЕК, 15-дек. — Sputnik. Башкы прокуратура Саламаттык сактоо министрлигинин алдындагы Дары-дармек менен камсыздоо департаментиндеги коррупциялык иштерди жоюу боюнча сунуш катын КРнын премьер-министрине жөнөттү. Бул тууралуу Башкы прокуратурадан кабарлашты.
Ошондой эле сунуш катта департаменттин башкы директору Рустам Курмановдун мындан ары кызмат ордунда калар-калбасы жана департамент менен министрликтеги тиешелүү адамдарды дисциплинардык жоопкоо тартуу сунушталат.
Белгилей кетсек, департаменттин ишин териштирүүнүн негизинде коррупциялык багыттагы 10 кылмыш иши козголгон.
Маалыматка караганда мамлекетке келтирилген материалдык чыгым 22 миллион 327 миң 715 сомду түзгөн.
Учурда жогоруда айтылган кылмыш иштери боюнча иликтөө иштери жүргүзүлүп жатат.
