БИШКЕК, 13-дек. — Sputnik. Кыргызстандагы элдик таланттар "Эл ичи – өнөр кенчи" республикалык кароо сынагынын жыйынтыгы менен аныкталып, жеңүүчүлөр белгилүү болгонун Маданият, маалымат жана туризм министрлиги билдирди.
Аталган сынкта мыкты үй-бүлөлүк ансамбль номинациясы боюнча Жумгал районунан келген Жумадил Көбөгөновдун үй-бүлөсү биринчи орунга татып, 75 миң сом акчалай сыйлык алса, Тоң районунан келген Серкебаевдин "Кут" ансамбли экинчи орунга ээ болуп, 55 миң сом алды. Үчүнчү орунду Ош облусунун Араван районунан келген Курбанбаевдин үй-бүлөсү алып, 35 миң акчалай сыйлык алды.
Түрдүү номинация боюнча орун алган жеңүүчүлөрдүн тизмеси.
Улуттук аспаптарда мыкты ойногондор:
- 1-орун — Карим Дыйканов, Баткен району;
- 2-орун — Раимберди Акунов, Өзгөн району;
- 3-орун — Жаркынай Абдазова, Алай району.
Кыргыздын улуттук бийи:
- 1-орун — Жети-Өгүз районунун "Кызгалдак" бий тобу;
- 2-орун — "Аллегро" улуттук бий ансамбли;
- 3-орун — Жалал-Абад облусунун Кара-Көл шаарынын "Жаш кыял" бий тобу.
Андан сырткары, мыкты комузчулар, обончулар, манасчы жана дастанчылар аныкталды. Биринчи орунга 75 миң сом, экинчи орунга 55 миң жана үчүнчү орунга 35 миң сом акчалай сыйлык каралган.
"Эл ичи өнөр кенчи" республикалык кароо сынактын максаты аймактарда элдик чыгармачылыкты өнүктүрүү жана сактоо болуп эсептелет.
