БИШКЕК, 12-дек. — Sputnik. Анкара Москвадан виза менен түрк бизнесине коюлган чектөөлөрдү алып салууну суранып жатканын Түркиянын тышкы иштер министри Мевлют Чавушоглу Sputnik Түркия агенттигине билдирди.
ТИМ башчысы экономикалык мамилелерди жөнгө салуу маселеси жакында эле Түркиянын өкмөт башчысы Бинали Йылдырымдын Россияга болгон сапарында талкууланганын белгиледи.
"Биз Россия тараптан визаны жоюу жана учурдагы чектөөлөр менен тоскоолдуктарды алып салууну суранып жатабыз. Россия тарап бул маселелердин үстүндө иштеп жатат. Биздин премьер-министрдин сапарынан кийин жолугушуудан жыйынтык чыгарына ишенем", — деп билдирди Чавушоглу.
Ал ошондой эле Түркия менен Россия энергетика маселесин дагы талкуулап жатканын кошумчалады. Анын айтымында, Түркиянын өкмөт башчысынын Россияга болгон иш сапарына чейин эле "Түрк агымы" аттуу газ түтүгүн куруу боюнча келишим ратификацияланган. Мындан тышкары, "Аккую" атомдук электр станциясын куруу боюнча сүйлөшүүлөр жүргөн. Түркия ошол станциядан 2023-жылга чейин биринчи электр энергия алууну пландап жатат.
