БИШКЕК, 12-дек. — Sputnik. Дүйшөмбү күнү "Манас" кинотеатрында "Кыргызстан — кыска метраждуу тасмалар өлкөсү" аталышындагы VI эл аралык фестивалдын салтанаттуу ачылышы болду. Ал режиссер Болот Шамшиевдин “Манасчы” документалдуу тасмасы менен башталды.
Иш-чара 12-декабрдан 15-декабрга чейин уланып, улуу жазуучу Чыңгыз Айтматовдун жаркын элесине арналууда.
Фестивалдын түптөөчүсү, Жогорку Кеңештин депутаты Садык Шер-Нияз кинофестивалдын ачылыш аземинде мындан бир нече жыл мурда дүйнө Кыргызстанды жалаң төңкөрүштөр аркылуу таанып калганын айтты.
"Ушундай ойлордон улам Кыргызстанды жакшы жагынан дүйнөгө таанытуу, кино тармагын өнүктүрүү максатында аталган долбоор ишке ашкан", — деди Шер-Нияз.
Эске салсак, Sputnik Кыргызстан маалымат агенттиги жана радиосу кинофестивалдын өнөктөшү болуп эсептелет.
