БИШКЕК, 10-дек. — Sputnik. Кыргызстанда адамдын ар намысы жана адилеттүүлүккө умтулуусу мамлекеттик саясаттын жогорку баскычында турат, ал эми элибиз өлкөдө авторитаризмге кайра кайрылууга жол жок экендигине ынанды. Бул туурасында президент Алмазбек Атамбаевдин Адам укуктарын коргоо күнүнө байланыштуу бүгүнкү кайрылуусунда айтылат.
Мындан 50 жыл мурда Бириккен Улуттар Уюмунун (БУУ) Башкы ассамблеясы экономикалык, социалдык жана маданият укуктары жөнүндө Эл аралык пактыны жана "Жарандык жана саясий укуктар жөнүндө" Эл аралык пактыны кабыл алган.
"КМШ мамлекеттеринен биринчилерден болуп Кыргызстан адам укуктары боюнча бул эки негизги эл аралык келишимдерге кошулган. Бүгүн дүйнөлүк коомчулук менен бирге Адам укуктарын коргоо күнүн белгилеп, биз адамдын негизги эркиндиктерин жана укуктарын сактоону жактай турганыбызды дагы да тастыктап жатабыз", — деп айтылат кайрылууда.
"Кыргызстандын БУУнун адам укуктары боюнча Кеңешине мүчө болуп шайланышы — биздин адам укуктарын коргоо боюнча жетишкендиктерибиздин объективдүү баасы жана Кыргызстан демократия жана мыйзамдуулук жолунда өнүгүп жаткандыгын дүйнөлүк алкакта таануусу", — деп жазылган.
Атамбаев ар намыс жана адилеттүүлүк азыркы Кыргызстандагы негизги баскыч экендигин айткан.
"Кыргызстанда адамдын ар намысы жана адилеттүүлүккө умтулуусу мамлекеттик саясаттын жогорку баскычында турат, ал эми биздин элибиз өлкөдө авторитаризмге кайра кайрылууга жол жок экендигине ынанды", — деген Атамбаев.
Ал кыргызстандыктарга тынччылык, жакшылык, ден соолук, бакубатчылык, мыйзамдуу укуктардын сакталышын жана келечекке зор ишеним каалаган.
