Сасык тумоо менен ооругандар былтыркыга караганда 8,5 пайызга көп

БИШКЕК, 7-дек. — Sputnik. 11 айдын жыйынтыгы менен сасык тумоого кабылган 165 миңден ашык учур катталып, бул былтыркыга караганда 8,5 пайызга көп экенин Саламаттык сактоо министрлиги билдирди.

Сасык тумоо менен ооругандар негизинен Бишкек шаары, Чүй, Талас, Ош жана Баткен облустарында көп катталган. Сасык тумоого кабылгандардын 63 пайызы 14 жашка чейинки балдар болуп эсептелет.

"Сасык тумоого чалдыккандарды күн сайын аныктоо боюнча жүргүзүлгөн мониторингге ылайык бир жума мурдагыга (4019 учур) салыштырмалуу сасык тумоого чалдыккандар 2,4 эсе көп (9729 учур) катталды. Бүгүнкү күнү медициналык мекемелерге жардам сурап кайрылгандардын саны 9220 киши болсо, алардын 179у ооруканага жаткырылган. Алардын ичинен 14 жашка чейинки балдардын саны 137ни түзөт. Республикалык клиникалык ооруканага бир суткада 150 кишиге чейин кайрылып жатат. Учурда бул жакта 433 оорулуу дарыланууда. Алардын 263ү балдар", — деп жазылат маалыматта.

Өлкө боюнча сасык тумоого кабылгандар эпидемиологиялык нормадан 2,3 эсе көп экенин Саламаттык сактоо министрлиги баса белгилейт.

Ал эми сасык тумоодон улам 7-декабрга карата өлкө боюнча 161 мектеп карантинге жабылганын Билим берүү жана илим министрлиги билдирди.

"Чүй облусунда — 64, (Ысык-Ата району — 19, Аламүдүн району — 23, Сокулук району — 6, Панфилов району — 10 жана Москва районунда — 1) Жалал-Абад облусунун Токтогул районунда 2, Бишкек шаарында 95 мектеп жабылган. Өлкөнүн калган аймактарында мектептер кадимки тартипте иштеп жатат", — деп Билим берүү министрлигинин маалымат кызматы билдирди.

Ошондой эле Чүй облусунда 10 бала бакча карантинге жабылган. Өлкөнүн башка облусундагы бала бакчалар иштеп жатканын министрликтен белгилешти.