ОШ, 5-дек. — Sputnik. Кара-Сууда мүмкүнчүлүгү чектелген 19 жаранга майыптар арабасы тапшырылды. Бул тууралуу Кара-Суу райондук социалдык өнүктүрүү башармалыгынын башчысы Куттубек Абдуллаев Sputnik Кыргызстан агенттигинин кабарчысына билдирди.
Мындан сырткары, 30 майып жаранга жергиликтүү бийлик акчалай жардам көрсөттү.
"Социалдык өнүгүү министрлиги тарабынан медициналык экспертизанын жыйынтыгы менен майып деп табылган жарандарга беш жылда бир акысыз түрдө арабалар берилип келет. Бул жылы 3-декабрь майыптардын эл аралык күнүнө карата 19 жаранга министрлик тарабынан арабалар тапшырылды. Ал эми жергиликтүү бийлик майыптарга материалдык жактан жардам көрсөтүп келет", — деди Абдуллаев.
Кара-Cуу райадминистрациясынан билдиргендей, Жоош айыл өкмөтүндөгү дүлөйлөр жана дудуктар интернатына кичи автобус белекке берилип, интернаттын спорт залына спорттук шаймандар сатылып берилген.
Интернаттын спорт залынын курулуш иштери республикалык бюджеттин эсебинен курулуп, ага 14 миллион сомдон ашуун каражат жумшалган. Майыптар үчүн арабаларды тапшыруу аземи концерттик программа менен коштолду.
