Кийинки жылдын 1-октябрына карата 2 миллиондон кем эмес жаранга биометрикалык паспорт берүү пландалууда. Бул туурасында Sputnik Кыргызстан маалымат агенттигине Мамлекеттик каттоо кызматынын маалымат катчысы Мелис Эржигитов билдирди.
Буга чейин аталган кызматтын жетекчиси Тайырбек Сарпашев "Электрондук башкаруу жөнүндөгү" мыйзамдын кабыл алынышы менен электрондук өкмөттүн принциптерин мыйзамдуу түрдө чыңдоого жардам берерин айткан.
"Паспорттордун киргизүү үчүн 30 мыйзам долбооруна, жети кодекске, өкмөттүн сегиз токтомуна толуктоо-өзгөртүүлөрдү киргизүү керек", — деди Эржигитов.
Укуктук-нормативдик актыларга, мыйзамдарга толуктоолорду киргизүү бүтөрү менен жарандардан жаңы документке анкеталарды алуу башталат.
"Толуктоолор менен өзгөрүүлөр жаңы жылга чейин, эгерде кечигип калса, январь ичи кабыл алынып бүтөт да, февралдан тарта элден биометрикалык паспортко өтүү боюнча анкеталарды топтоп, жыйнап баштайбыз", — деди Эржигитов.
Ал электрондук паспорт жаңы сапатка жооп бере турган, коргоо элементтери жагынан да ишенимдүү документ болорун кошумчалады.
