"Дордой" базары толугу менен жабылган жок. Аталган соода-базар комплексинин башка базарларында 2-3 өтмөк жабылган, ал эми калгандары кадимки калыбында иштеп жатат. Бул туурасында Sputnik Кыргызстан агенттигине "Дордой" соода-базар комплексинин жетекчиси Жумабек Салымбеков билдирди.
"Дордойдо" баш-аягы болуп, 17 субъект бар. "Алкан" базарында өтмөктүн чатыры карды көтөрө албай кулап түштү. Учурда кар калың жаап, 35 сантиметрге чейин жетип, чатырларга оордук келген. "Дордой" базары толугу менен жабылган жок. Башка базарларда 2-3 өтмөк жабылган, ал эми калгандары кадимки калыбында иштеп жатат. Шаардыктарды, туристтерди кабыл алып жатабыз", — деди.
Салымбеков базардагы кырсыктан жабыр тарткандарга компенсация берилерин айтты.
"Администрация тараптан жабыр тарткандарга толук жардам берилет. Муну көзөмөлгө алабыз. Андан сырткары өзүбүз да жардам бергенге даярбыз", — деди ал.
Эске сала кетсек, 29-ноябрда Борбор Азиядагы ири базар "Дордой" соода-базар комплексинин аймагындагы "Алкан" базарында негизги өтмөктүн чатыры түшүп кетип, кишилерди басып калган. Андан жабыркаган беш киши Бишкектеги травматология жана ортопедия илим-изилдөө борборуна жеткирилген.
