БИШКЕК, 26-ноя. — Sputnik. Кыргызстандын футбол боюнча курама командасынын оюнчулары атамекендик компанияларды бренддин жүзү катары кызыктырып жатат. Бул тууралуу Sputnik Кыргызстан агенттигине Футбол федерациясынын PR-менеджери Бегимай Өмүралиева билдирди.
Анын айтымында, мурда Федерация менен кызматташып жүргөн соода маркаларынын биринин логотибине Кыргызстандын футбол боюнча курама командасынын жарым коргоочусу Антон Землянухиндин сүрөтү түшүрүлө турган болду.
"Футболчу компаниянын жүзү болуп жаткан учур Кыргызстанда биринчи жолу катталып жатат. Биз мындан ары да кызматташтыгыбызды өнүктүрөбүз деген ойдобуз. Мындан сырткары башка компаниялар бир гана алардын жүзү болбостон, иш-чараларга да тартуу сунуштары менен кайрылып жатышат", — деди Өмүралиева.
Дүйнөлүк спортчуларга көбүнчө рекламалык компаниялардан сунуштар түшөт. Спорт оюнчулары анын ичинде футболчулар миллиондогон акчаларга бренддердин жүзү болуп келет.
Алсак, "Реал Мадриддин" чабуулчусу жана Португалия курама командасынын капитаны Криштиану Роналду Nike компаниясы менен өмүр бою иштеше турган келишимге кол койгон. Ал аталган компания менен иштешкендиги үчүн жылына 24 миллион доллар алып турат.
