Былтыркы жылы эсиңиздерде болсо шайлоонун шарапаты менен жакшы эле шапар тепкенбиз. Заматта жумушсуздук маселеси чечилип, калктын көпчүлүгү иш менен камсыз болгон. Тойлор көк бөрү менен коштолуп, кыскасы кара жорго бийлеп эле калганбыз. Бекердин берекеси жок демекчи, жыргал жашоо шайлоодон кийин кан буугандай тып токтоду. Айды алып берем деген партиялар айткандарын аткармак турсун, айылдарга барбай калды. Карапайым калк болсо кайрадан эле көр тирилик менен убара болуп кала берген. Өткөн айда отпуске алып айылга барсам, шайлоонун шайыр добуштары чыга баштаптыр. Партиялар көнгөн адатынча айды алып берүүнү убадалап жүрөт. Баягы эле көрүнүш. Бар тапканын бапырап чачкан партиялар, добушун 100 долларга сатып ийип беш жыл депутаттарга догурунуп жүргөн эл.
Шайлоо таза өтөрүн бешиктеги балага айтсаң да ишениши кыйын. Анткени бакыйган Бакыт Төрөбаев Жогорку Кеңеште туруп алып фалсифиакция болот, деп шектенип жатат. Албетте, бийликчил делген КСДП фракциясынын лидери Иса Өмүркулов алдын ала антип айтуу кылга сыйбай тургандыгын жар салды. Анткен менен кимисиники туура экенидигин убакыт көрсөтөт.
Депутат демекчи, эл өкүлү Рыскелди Момбеков "Дыйкан" базарынын жабылышына жеке адамдар кызыкдар дейт.
Ал ортодо маршруттук такси айдаган айдоочулардын бири да экзаменден өтпөй калды. Экинчи тилкеден бурулганды, көк музда ашып өткөндү жакшы билишет да жол эрежелерин билбейт турат.
Эх…андан көрө Атай Өмүрзаков менен болгон маекти окуйлу.
Баса, Бишкекте бүгүн 2 градус суук болот.
Валюта наркы. Бүгүн сомдун баасы долларга карата орто эсеп менен 68.90 (сатып алуу) жана 69.21 (сатуу) сомду түздү.
Мунай баасы. Бишкекте орточо эсеп менен алганда Аи-92 үлгүсүндөгү май 36.80 сом, Аи-95 үлгүсүндөгү бензин 39.00 сом, ал эми дизель майы 35.80 сомдон сатылууда.
Соңку сөз ордуна. Добушту сатуу беш жылдык келечекти сатууга барабар.
Өлкөнүн өнүгүүсүн тилеп, Исмаил Мамытов.
