БИШКЕК, 24-ноя. — Sputnik. Жогорку Кеңештин төрагасы Чыныбай Турсунбеков Россиянын Федералдык Жыйынынын Федерация Кеңешинин төрайымы Валентина Матвиенко менен жолугушууда ЕАЭБдин алкагында түзүлгөн мүмкүнчүлүктөрдүн толук пайдаланылбай жатканын айтты. Бул туурасында Жогорку Кеңештин маалымат кызматы билдирди.
Жолугушуу Санкт-Петербург шаарында өтүп жаткан Көз карандысыз мамлекеттер шериктештигинин Парламенттер аралык ассамблеясынын (КМШ ПАА) жана Жамааттык коопсуздук келишим уюмунун Парламенттик ассамблеясынын (ЖККУ ПА) кезектеги жыйындарынын алкагында өттү.
ЕАЭБдин алкагында түзүлгөн мүмкүнчүлүктөрдүн толук пайдаланылбай жатканын айткан төрага Турсунбеков бул жаатта сүйлөшүүлөрдү жүргүзүү зарылчылыгына токтолгон.
"Товар алмашуунун көлөмүн жогорулатуу менен, аймактар аралык кызматташтыкты да кеңейтишибиз шарт. Айрыкча, Кыргыз-Россия фондусунун ишмердүүлүгүн күчөтүү керек", — деп белгилеген спикер.
Жолугушууда тараптар фитосонитария, миграциялык "кара тизме", экстремизм жана терроризм маселелерин талкуулады.
Федералдык жыйындын Федерация Кеңешинин төрайымы Матвиенко мигранттарга түзүлгөн шарттар туурасында пикирин мындайча билдирди.
"Евразия экономикалык биримдигинин иши жаңыдан жыла баштады. Карапайым калк анын пайдасын сезиш үчүн дагы да убакыт керек. Ал эми фитосанитария маселесин эки тараптуу сүйлөшүүлөрдүн негизинде чечишибиз зарыл", — деди Матвиенко.
ЖК депутаттарынан турган делегация Санкт-Петербург шаарында кечээ жөнөп кеткен.
