БИШКЕК, 23-ноя. — Sputnik. Түштүк Кореянын президентинин администрациясы мамлекет башчынын жардамчылары үчүн буга чейин 360 таблетка виагра сатып алгандыгын тастыктады. Бул туурасында РИА Новости Ассошиэйтед Пресс агенттигине шилтеме кылып билдирди.
Аталган таблеткалар былтыркы жылдын декабрь айында сатып алынган. Президент Пак Кын Хенин администрациясы дары жардамчылар жана жүздөгөн башка кызматкерлер үчүн Эфиопия, Уганда жана Кенияга болгон сапарында түтөктөн улам алынгандыгын айтты. Анын себеби катары "аймактын көчөлөрү деңиз деңгээлинен 1-2 чакырым бийиктикте жайгашкандыгы" билдиришкен. Буга кошумча кээде корей дарыгерлери альпинисттерге түтөктүн дабасы катары виаграны жазып бере тургандыктары кабарланган.
Администрация өкүлү таблеткалар алынып, бирок, колдонулбай калгандыгын бекемдеген. Буга чейин Түштүк Кореянын прокуратурасы президент Пак Кын Хеден аны коррупция чырына байланышы бар-жоктугу боюнча сурак берүүсүн талап кылган. Кореянын президентинин айланасында бул чыр басылмаларга Пак Кын Хе мамлекеттик кызматка тиешеси жок, өзүнө жакын Цой Сун Силге мамлекеттик деңгээлде сүйлөй турган сөзүн оңдоп-түзөгөнгө берди деп жазып жибергенден кийин күчөп кеткен. Материалдарда мындай жол менен ал адам мамлекеттин саясатына таасирин тийгизип жатат деп айтылган. Мындан сырткары, Цой өзүнүн саясий таасирин пайдаланып, өзүнө тиешелүү эки фондунун эсебине башка ири корпорациялардан акча чогулткан деп шектелип жатат. Анын фондуларына 52 компания менен 19 бизнес-топтордон 70 миллионго чукул каражат которулган.
