БИШКЕК, 22-ноя. — Sputnik. Мындан ары Россияда жүргөн кыргызстандыктар ыктыярдуу медициналык камсыздоосу (ЫМК) жок болгондугу үчүн административдик жазага тартылбайт. Бул тууралуу Россиядагы КР элчилигинин маалымат кызматынан билдиришти.
Элчиликтин маалыматына таянсак, Беларуссия, Кыргызстан, Тажикстан, Казакстан жана Россиянын 2000-жылдын 30-ноябрындагы визасыз режим тууралуу өкмөттөр аралык келишимине ылайык, КР жарандары медициналык камсыздоо күбөлүгү жок болгондугу үчүн административдик жоопкерчиликке тартылбай турганын Россиянын компетенттүү органдары тастыкташты.
"Мындан ары Россиянын административдик мыйзам бузуулар боюнча кодексинин 18.8-беренесине ылайык ыктыярдуу медициналык камсыздоосу жок жарандар жоопко тартылбай турган болду", — делет билдирүүдө.
Мындай чечимдин чыгышына байланыштуу элчилик Россиянын аймагынан медициналык камсыздоонун жоктугунан улам чыгарылган жарандар Мамлекеттик миграция кызматына арыз менен кайрылуусун сунуштайт.
