БИШКЕК, 21-ноя. — Sputnik. Караколдогу медициналык колледждин директору Анарбүбү Апсалиеваны өлтүрүүгө шектелген жаран кармалганын Ысык-Көл ОИИББдин маалымат кызматы билдирди.
Аталган билим берүү мекемесинин директорунун өлүмү тууралуу 17-ноябрда саат 13:00дө белгилүү болгон. Маркумдун кызы энесинин сөөгүн ашканадан тапканын айткан. Криминалист-эксперттер аялдын денесине 23 жолу бычак сайылганын аныктап, Кылмыш жаза кодексинин 97-беренеси "Адам өлтүрүү" боюнча кылмыш иши козголгон.
Адам өлтүрүү фактысы катталгандан төрт күн өткөндөн кийин кылмышка маркумдун кесиптеши шектелип кармалган.
"Алдын ала сурак учурунда кармалган аял жасагандарын моюнга алды. Мындай кылмышка баруусуна жетекчисине болгон жек көрүүсү себеп болгонун айтты", — деп жазылат маалыматта.
Аталган факты боюнча тергөө амалдары жүрүүдө.
