Куюнда калып, илдетке чалдыккан жигиттин майыптыгы тиешелүү медициналык мекеме тарабынан далилденсе жөлөк пул чегерилет. Бул тууралуу Кара-Суу райондук социалдык өнүктүрүү башкармалыгынын башчысы Куттубек Абдуллаев аймактык кабарчыга билдирди.
Атанын айтымында, Миржигит 12 жашында мал айдап келе жатып, куюнга туш болгон. Катуу коркуп, андан кийин оорудан арыла албай койгон өспүрүмгө дарыгерлер "катуу корккон" деген диагноз коюшкан. 16 жылдан бери Миржигит өзү жалгыз калуудан коркуп, атасынын жанынан чыкпайт. Баласын таштап Абдибаит аксакал да эч жакка чыга албай, үйдө отурат.
Кара-Суу райондук социалдык өнүктүрүү башкармалыгынын башчысы Куттубек Абдуллаев маалымат Sputnik Кыргызстан агенттигине чыгаары менен кызматкерлер Тезекбаевдерден кабар алганын билдирди.
"Кара-Cуу райондор аралык медициналык социалдык экспертизалык комиссиясына кат менен кайрылуу жасадык. Эгерде комиссия тарабынан чындыгында баланын ден соолугу боюнча мүмүкүнчүлүгү чектелгени аныкталса, майыптыгы боюнча канчанчы топко тиешелүү экендиги такталып, корутунду чыкса, социалдык өнүктүрүү башкармалыгы Миржигит Тезекбаевге жөлөк пул чыгарып берүүнү колго алабыз", — деди ал.
28 жаштагы Миржигиттин энеси Минавар Тезекбаева мындан төрт жыл мурун каза болуп калгандыктан, учурда ата-бала бир үйдө жалгыз жашайт.
