Анын айтымында, Кыргызстан күйүүчү жана майлоочу майды 100 пайыз Россиядан алат. Ал эми Россия майдын наркын кымбат баа менен коё берип жаткандыктан да баалар көтөрүлүп жатат.
Акенеев Казакстан мындан алты жыл мурда күйүүчү майды Кыргызстанга экспорттоого тыюу салган токтом кабыл алганы да бензиндин баасына таасирин тийгизип жатканын айтып, токтом жокко чыгарылса Казакстандан дагы май келип, ал баага өзүнүн оң таасирин тийгизмек деп белгиледи.
Анын айтымында, эгер Кара-Балта менен Токмоктогу нефтини кайта иштетүүчү заводдор иштей баштаса, Кыргызстан өзүнүн керектөөлөрүнүн 80-90 пайызын камсыздоого мүмкүн болмок.
"Кара-Балта менен Токмок шаарында эки заводубуз бар. Ошолорду камсыз кылуу үчүн Россиядан 1,5 миллион тонна нефть алуу боюнча келишим түзүлгөн. Ушул эки завод иштеп калса өзүбүздүн 80-90 пайыз талабыбызды камсыз кылмакпыз. Биздин шартта май арзан болмок", — деди ал.
Акенеев Кыргызстанда 2,5 айга жеткидей майдын запасы бар экенин, андыктан кооптонууга негиз жок экенин айтты.
