БИШКЕК, 13-ноя. — Sputnik. Ишемби күнү Жаштар аллеясында коомчулукка "Кыргыз айылы" иш-чарасы өттү. Бул тууралуу Жаштар, дене тарбия жана спорт боюнча мамлекеттик агенттиктен кабарлашты.
Активисттер шаардын жашоочулары менен конокторуна көчмөн кыргыз элинин салттарын, улуттук маданиятын тартуулашты. Каалагандар ал жерден кыргыз даамын татып, көл өнөрчүлүк, боз үй тигүү жана улуттук оюндар боюнча мастер-класска күбө болду.
"Биздин өсүп келе жаткан муундарыбыз улуттун, бабалардын мурда колдонуп келген салтын, адаттарын, жашоо образын билбей баратат. Көптөр чет тилде сүйлөп, кыргыз тилин билбейт. Чет тилдердин үйрөнүүнү кош колдоп колдойбуз, бирок эне тилди унутуу болбойт. Күчтүү мамлекетти күчтүү эл гана кура алат, тамырын унутпайт, муну жаштар биле жүрүшү зарыл", — деп айтты мамлекеттик агенттиктин директору Бакыт Эгембердиев.
Бул иш-чара "Тарых жана маданият жылына" карата жана "Жаштар жумалыгынын" алкагында өттү. Аны Жаштар иши, дене тарбия жана спорт боюнча мамлекеттик агенттиги, Бишкек мэриясы, республикалык Манас жаштар ордосу жана "Көчмөн" коомдук фонду уюштурду.
Бул сапар өткөн иш-чараны кошкондо "Кыргыз айылы" экинчи ирет өткөрүлүп жатат.
