Мидин Сулайманкулов: Оштогу зилзаладан ураган үйлөрдүн 11и курулуп бүттү
Өкмөттүн Оштогу өкүлчүлүгүнүн маалымат катчысы Жумамидин Сулайманкулов өткөн жылы Кара-Суу районундагы Чайчы айылында болгон зилзаланын айынан жабыркаган тамдардын ордуна үйлөр курулуп, анын 11и бүткөнүн кабарлады.
Эске салсак, өткөн жылдын 17-ноябрында Кара-Суу районунун Чайчы айылында жети баллга жеткен жер титирөөнүн кесепетинен 500дөй турак үй жараксыз абалга келген.
"Калган турак жайларды кыш мезгилине чейин бүткөрүүгө аракет жасалып жатат. Дагы 177 үйдүн пайдубалы куюлуп, 152нин дубалдары тургузулган. 116 үйдүн чатыры жабылып, 55 үйдүн ичине ремонт иштери жүрүп жатат", — деп билдирди Сулайманкулов.
Ал ошондой эле Чайчы айылынын тургундарына өкмөт тарабынан 200 миң сомдон ссуда берилгенин кошумчалады.
