БИШКЕК, 2-ноя. — Sputnik. Референдум алдында шайлоочулардын кошумча тизмеси түзүлөт. Бул тууралуу Мамлекеттик каттоо кызматынын жетекчиси Тайырбек Сарпашев парламентте сүйлөп жатып билдирди.
Аталган суроону МКК жана БШК жетекчилерине "Республика — Ата-Журт" фракциясынын лидери Өмүрбек Бабанов узатты.
"Эки шайлоону бир күнгө алып чыгып жатабыз. Бюллетендер кандайча болот? Референдумга добуш берүүдө кошумча тизме болобу? Алар качан илинет?" — деп суроо салды Бабанов.
"Шайлоо участоктордо тийиштүү техника орнотулат, ичинде эки тизме болот. Шайлоочу келгенде автоматтык түрдө эки чек чыгат. Ошентип эки чек менен эки бюллетень алат. Ал эми референдумга шайлоочулар форма эки менен катыша алат. Бул кошумча тизме", — деди Сарпашев.
Ал эми БШК төрайымы Нуржан Шайлдабекова шайлоочулардын тизмеси 27-октябрдан баштап илинип турганын билдирди.
"Мыйзам боюнча шайлоого 45 күн калганда шайлоочулардын тизмеси илиниши керек. Ошондуктан 27-октябрда эле тизмелер илинип, тактоо жумуштары жүрүп жатат. 20 күн калганда бюллетендин тексти аныкталып, 10 күн калганда басып чыгарылат. Ал эми үч күн калганда участокторго жеткирилет", — деди Шайлдабекова.
Эл өкүлү Бабанов тизме түзүүдө так болууга чакырып, шайлоону таза өткөрүү керектигин баса белгиледи.
