Бүгүн күн чубактасак болчудай. Бишкекте күн 25 градуска чейин жылыйт, ал эми калган аймактарда күн ачык болот деп билдирди Кыргызгидромет.
Ар кыл, ар кандай милиция. Кечээ милициялар майрамдады, майрамдын эртеси да болду. А бүгүн биз каарман кызыл шапкечендерди эстеп коюну эп көрдүк. Арасында капотко жөргөмүшчө жабышканы, жолдон төрөт кабыл алганы, кылмышкерлерди кылтакка түшүргөндөрү бар.
И баса, милиция демекчи, эгемендүүлүк жылдарында Ички иштер министрлигин башкарып келген генералдардын жүзүн көрөм десениз, бул жакка кириңиз.
Өкмөттүн бул эмнеси? Кайберендерди атууга толук тыюу салбаш керек дейт го. 2030-жылга чейин аңчылыкка тыюу салуу тууралуу мыйзам долбоорго каршы экендиги белгилүү болду.
Камдашып келе жаткан ажырым. Кыргыз-өзбек чек арасынын 49 тилкеси боюнча позициялар макулдашылды. Албетте, жакшы кабар. Антпесе, эки эл эч жакка көчүп кетпегенден кийин, ынтымакта жашоодон өтөрү жок. Биздикилер эми Өзбекстанга "өтүп барат" экен.
Айласыз үй-бүлө, аргасыз абал. Бишкектен алыс эмес жерде төбөсү түшө турган үйдө учурда айласыздан эки үй-бүлө күн кечирүүдө. Энемдин үстүнө үй кылып берем, кара жанын карч уруп иштеп жүргөн уулу эки бөйрөгүн илдетке алдырган.
Газ кымбаттады. Бул айда көгүлтүр оттун баасы жарандар үчүн 13 тыйынга, ишканалар үчүн 15 тыйынга кымбаттады.
Тукумсуздук кооптуулугу. Эмне үчүн офисте иштегендер тукумсуз болуп калуу коркунучу тууралуу ойлонушу керек? Бул тууралуу билгиңиз келсе, уролог-андролог Нурлан Эгетаевдин маегин окусаңыз болот.
Ааламда. Австралияда жашаган 70 жаштагы кемпир Жоан Оливер мектепке барууну чечип, 12-класска көчүү үчүн экзамендерге даярдана баштады. Байбиче мындан 50 жылдык кыялын ишке ашыруу үчүн билимге умтулуп жатыптыр. Андыктан ыкшоолоно бербегиле… кээ бирөөлөр.
Валюта наркы. Бүгүн сомдун баасы долларга карата орто эсеп менен 68.75 (сатып алуу) жана 68.89 (сатуу) сомду түздү.
Мунай баасы. Бишкекте орточо эсеп менен алганда Аи-92 үлгүсүндөгү май 36.30 сом, Аи-95 үлгүсүндөгү бензин 39.00 сом, ал эми дизель майы 34.50 сомдон сатылууда.
Соңку сөз ордуна: Билеги күчүү бирди жыгат, билими күчтүү миңди жыгат
Күнүбүз куунак өтүшүн каалап, урматым менен, Нургүл Максутова.
